জগতগুৰু শ্ৰীমন্ত শঙ্কৰদেৱৰ আবিৰ্ভাৱ তিথি উপলক্ষে অসমৰ অভিভাৱক সকললৈ মোৰ বিনম্ৰ আহ্বান
“হৰি ভকতিৰ পাতিলন্ত হাট
শঙ্কৰে জগত জুৰি।
ৰাম নাম ৰত্ন বেহায়া জগতে
চলয় বৈকুণ্ঠ পুৰী।।”
– নামঘোষা
শঙ্কৰ আমাৰ শিৰোমণি
জগতগুৰু জনাই অসমীয়া তথা ভাৰতীয় সাংস্কৃতিক ক্ষেত্ৰখনক অনন্য, অতুলনীয় অৱদানেৰে অনুপম কৰি থৈ গৈছে।
অসমীয়া জাতিৰ সাহিত্য-সংস্কৃতিক সুন্দৰৰ ৰূপ দি নিৰ্মাণ কৰোঁতা, ৰূপকাৰ জগতগুৰু শ্ৰীমন্ত শঙ্কৰদেৱ গুৰুজনাই অসমীয়া সমাজ-জীৱনক সম্প্ৰীতিৰ ডোলেৰে একত্ৰিত কৰি জাতিটোক যুগ যুগান্তৰলৈ সবল আৰু সক্ষম কৰি থৈ গৈছে ৷ আমাৰ জাতিটোক স্বাভিমানেৰে জীয়াই থাকিবলৈ জগত গুৰুজনাই সুন্দৰ আৰু পোহৰৰ বাটেৰে আৰু অমৃত বচনেৰে আলোক প্ৰদান কৰি থৈ গৈছে ৷
কলা-কৃষ্টি, সু-চিন্তা, সাহিত্য আৰু আধ্যাত্মিকতাৰ এখন সমাজ গঠন কৰিবলৈ তেৰাই দিয়া বোধ শক্তিয়ে আমাক সদায় উদ্বুদ্ধ কৰি আহিছে।
মই অসমৰ প্ৰতিগৰাকী অভিভাৱকৰ শ্ৰীচৰণত সেৱা লৈ আহ্বান জনাইছোঁ যে, তেওঁলোকৰ সতি-সন্তানক গুৰুজনাৰ আবিৰ্ভাৱৰ তিথি উপলক্ষে যাতে প্ৰত্যেকৰে ঘৰত তেৰাৰ জীৱনাদৰ্শন, আদৰ্শ, কৰ্ম তথা কৃষ্টি-সংস্কৃতিৰ বিষয়ে সম্যক হ’লেও আভাষ প্ৰদান কৰে যেন ।
