উদ্যম আৰু কৰ্মস্পৃহাৰে জীৱন সংগ্ৰামৰ সকলো প্ৰত্যাহ্বানক নেওচি আগবাঢ়িছে ৰাজ্যৰ মহিলা সমাজ

মহিলা সবলীকৰণ তথা নাৰী সকলক আত্মনিৰ্ভৰ কৰাৰ ক্ষেত্ৰত পঞ্চায়ত আৰু গ্ৰামোন্নয়ন বিভাগৰ অন্তৰ্গত ‘অসম ৰাজ্যিক গ্ৰামীণ জীৱিকা অভিযান’ ৰ তৰফৰ পৰা বহু উল্লেখনীয় পদক্ষেপ গ্ৰহণ কৰি আহিছে ৷

শেহতীয়াকৈ কাজি নেমুৰ দৰে ঔষধি গুণসম্পন্ন টেঙাৰ খেতিৰে গ্ৰামাঞ্চলৰ আত্মসহায়ক গোটৰ মহিলা সদস্য সকলক উপাৰ্জনক্ষম হ’বলৈ সহায় কৰিছে অসম ৰাজ্যিক গ্ৰামীণ জীৱিকা অভিযানে ৷ আমাৰ সকলোৰে জ্ঞাত যে, গৰমৰ দিনবোৰত কাজি নেমুৰ চাহিদা যথেষ্ট পৰিমাণে বৃদ্ধি পায় ৷ তাৰোপৰি, এই কাজি নেমুৰ বহুত ঔষধি গুণো আছে বুলি আমি জানো ৷ এই সুযোগ গ্ৰহণ কৰি BMMU মাহমৰাৰ নিজখালৈঘুগুৰা গাঁও পঞ্চায়তৰ অন্তৰ্গত ৫ টাকৈ গ্ৰাম্য সংগঠনে মুঠ ৪,২০০ জোপা নেমু গছ আত্মসহায়ক গোট সমূহক প্ৰদান কৰে ৷

উল্লেখ্য যে, উক্ত পঞ্চায়তৰ আত্মসহায়ক গোট সমূহৰ নাৰ্চাৰীৰ পৰা এই নেমু পুলিবোৰ সংগ্ৰহ কৰি তেওঁলোকক আগন্তুক দিনৰ বাবে উৎসাহিত আৰু অনুপ্ৰাণিত কৰে ৷

অসম ৰাজ্যিক গ্ৰামীণ জীৱিকা অভিযানৰ প্ৰতিজন বিষয়া এনেধৰণৰ পদক্ষেপ সমূহৰ বাবে ধন্যবাদৰ পাত্ৰ ৷ লগতে অসমৰ অন্য মহিলা সকলোকো মোৰ বিনম্ৰ আহ্বান যে, আপোনালোকেও এনেধৰণে স্বাৱলম্বী হ’বলৈ নিকটতম অসম ৰাজ্যিক গ্ৰামীণ জীৱিকা অভিযানৰ কাৰ্যালয়ৰ সৈতে যোগাযোগ কৰক ৷